ആലപ്പുഴ: ജില്ലാ ടൂറിസം പ്രമോഷൻ കൗൺസിലിന്‍റെ നേതൃത്വത്തിൽ ആലപ്പുഴ ബീച്ച് ഫെസ്റ്റ് 27 നു റേഡിയോ മാംഗോയുടെ പരിപാടിയോടെ ആരംഭിക്കും. ‘മാംഗോ ബീറ്റ്സ്’ എന്ന പേരിൽ ഡിജെ സാവിയോ നയിക്കുന്ന ഡിജെയാണു പ്രധാന ആകർഷണം.

31 നു രാത്രി വരെയാണു പരിപാടികൾ. മത്സരങ്ങളും വിവിധ കലാപരിപാടികളുമായി ബീച്ച് ഫെസ്റ്റ് ഉത്സവാന്തരീക്ഷം സൃഷ്ടിക്കും. 31 നു രാത്രി ബാൻഡ്, ഡിജെ തുടങ്ങിയവയുമുണ്ടാകും.ആലപ്പുഴ ബീച്ച് ഫെസ്റ്റ് മാതൃകയിൽ ചേർത്തലയിൽ കനാൽ ഫെസ്റ്റും, മാരാരിക്കുളം ബീച്ച് ഫെസ്റ്റും, അർത്തുങ്കിൽ ബീച്ച് ഫെസ്റ്റും നടക്കും.

ചേർത്തല ടിബി കനാൽക്കരയിൽ 29 മുതൽ 31 വരെയാണ് കനാൽ ഫെസ്റ്റ് നടക്കുന്നത്. വൈകുന്നേരം എഎസ് കനാൽ വശങ്ങളിൽ അഞ്ചു കിലോമീറ്റർ ദൂരത്തിൽ കനാൽ ഫെസ്റ്റ് വിളംബര വിളക്കു തെളിയിക്കും. 30 നു വൈകിട്ട് 6 നു ഡാൻസ് മത്സരം, 31 ന് ഉച്ചയ്ക്ക് രണ്ടിനു ചേർത്തലയിലെ ടൂറിസം സാധ്യതകൾ ശിൽപശാല, ആറിനു മെഗാ ഷോ എന്നിവ നടക്കും.

ജില്ലാ ടൂറിസം പ്രമോഷൻ കൗൺസിലിന്‍റെ നേതൃത്വത്തിൽ മാരാരിക്കുളം ബീച്ചിൽ നടത്തുന്ന ഫെസ്റ്റ് നാളെ ആരംഭിക്കാനാണ് സാധ്യത. ഇവിടെയും സംഗീത പരിപാടികളാണ് പ്രധാനമായും ഉണ്ടാവുക.

അർത്തുങ്കൽ ബീച്ച് ഫെസ്റ്റ് 30 നു വൈകുന്നേരം മൂന്നിന് അർത്തുങ്കൽ ബസിലിക്ക അങ്കണത്തിൽ നിന്ന് കടൽത്തീരത്തേക്കു ഘോഷയാത്രയോടെ ആരംഭിക്കും. 31 നു രാവിലെ 10 ന് അർത്തുങ്കൽ പൊഴിയിൽ പൊന്തു വള്ളംകളി, വൈകിട്ടു സംഗീത വിരുന്ന്, കലാസന്ധ്യ എന്നിവ നടക്കും.